waso pi noka laso

waso pi noka laso, Peter Gene

waso pi noka laso li lon kulupu ma Kalapako li lon ma Mewika. jan pi toki Elopa mute li nimi e ona kepeken nimi "waso nasa" anu "waso pi sona ala". nimi ni li kama tan ni: tenpo pini suli la jan Epanja li tawa ma ni li lukin e waso ni. jan li wile alasa e ona li wile moku e ona. nasa la waso li tawa weka ala tan jan. tan ni la jan ni li pilin e ni: waso ni li nasa. taso waso ni li sona ala e jan li ken ala pilin e ni: jan li ken moli e ona.

waso pi noka laso li lon poka telo suli. ona li moku e kala. ona li alasa kepeken nasin ni: ona li tawa kon li sewi. tan ni la kala li ken ala lukin e ona. waso li lukin e kala la ona li wan e luka lon poka ona li anpa wawa tawa telo li kama jo e kala.

oko pi waso ni li nasa pona. oko pi waso meli li pimeja. taso oko pi waso mije li jelo. sike lili pi oko ona li pimeja. waso ni li nasa tan ni kin: noka ona li laso. waso ante ali li jo e noka pi kule ante.

noka laso li suli tawa waso ni tan ni: mije li wile unpa la ona li tawa musi. ona li sewi e noka tan ni: meli li ken lukin pona e noka. noka laso li pona lukin tawa meli. noka li laso mute la mije li pona mute. meli li pilin e ni: "a! noka pi laso mute! mije ni li wawa mije kin! ona li alasa pona. tenpo kama la ona li mama pona tawa waso lili mi".

jan Ote