soweli pi uta waso

soweli pi uta waso, Ph. Bethge
soweli pi uta waso li lon ma Oselija. sijelo ona li jo e linja mute sama sijelo soweli. uta ona li sama uta waso. lipu monsi ona li sama lili lipu monsi kala. ni li nasa.

ona li pali e lupa lon poka pi telo tawa. ni li tomo ona. soweli pi uta waso li tawa wawa lon ma li tawa wawa lon telo. tenpo suli la ona li tawa lon sewi pi ko pi anpa telo li kama jo e kala. ona li moku e kala lili e kala pipi e kala akesi.

ona li kama mama la ona li pana e sike mama. soweli lili li kama tan sike mama ni. soweli pi uta waso li pana e sike mama sama waso anu akesi. taso ona li soweli tan ni: ona li pana e telo mama. taso ona li jo ala e nena mama. a! ni li nasa kin. ona li pana e telo mama tan sinpin ona.

jan li wile pana e ike tawa soweli pi uta waso la soweli ni li pilin e ni: "o pana e ike ala tawa mi! sina pana e ike la mi utala e sina kepeken palisa pi telo ike!". ni li lon kin. soweli ni li jo e palisa pi telo ike lon noka ona. ona li utala e jan la jan ni li pilin ike mute mute. tenpo ni la ala li ken pana e pona tawa jan ni. tan ni la o pana e ike ala tawa soweli pi uta waso.

jan Mika