soweli pi poki sinpin

soweli pi poki sinpin, R. Parviainen
soweli pi poki sinpin li lon ma Oselija. ona li lon ma supa. ona li anpa e sinpin ona li kama jo e kasi kepeken uta. ona li sewi e sinpin ona li moku e kasi. kasi li pona tawa ona. taso jan li kama jo e soweli ni la ona li ken moku e kili.

luka ona li suli ala. taso noka ona li suli li wawa. ona li wile tawa mute la ona li kepeken e noka taso. monsi linja ona li suli li wawa. soweli pi poki sinpin li ken anpa lon monsi linja ona li utala kepeken noka wawa. jan li wile utala e ona la ona li ken utala e jan.

meli pi soweli ni li jo e poki lon sinpin ona. ni li nasa. soweli sin li kama lon tan mama la ona li lili sama pipi suli. ona li pilin e kon pi telo mama tan insa poki. tan ni la soweli lili li tawa poki. ona li moku lon insa poki li lape lon insa poki. mama li tawa lon ma la soweli lili li awen lon insa poki. soweli lili li tawa ala tan insa poki.

soweli lili li kama suli. tenpo mun tu li pini la soweli li tawa e lawa ona tan poki mama. ona li kama jo e kasi li moku. tenpo kama la ona li tawa tan poki tawa ma. ike li lon la ona li tawa weka tawa insa poki. soweli ike li ken ala kama jo e ona. ni li pona. soweli lili li pilin e ni: "mama mi li suli li wawa. ona li tomo mi".

jan Ote