kala suwi

kala suwi, iwmpop
kala suwi li lon telo wan taso. telo ni li telo Sosimiko. ona li lon ma Mesiko. tenpo pini la kala suwi li lon telo tu. taso telo pi nanpa tu li kama ma. ni li ike. telo li kama ma la kala suwi li moli. telo li kama jaki la kala ni li moli. seli pi telo pi kala ni li awen. ona li ante lili la kala li moli.

jan li lukin e kala suwi li pilin sama ni: kala ni li pilin pona. ni li lon tan ni: uta ona li sama uta jan pi pilin pona. palisa monsi ona li jo e lipu. taso kala suwi li kala akesi kin. ona li jo e luka akesi e lipu lon poka lawa ona. ona li kama jo e kon kepeken lipu ni. ona li jo e linja soweli ala e selo kala ala. selo ona li sama selo pi akesi pi tawa sewi wawa.

kala ante anu akesi anu soweli li ken pona lili e sijelo ona. taso sijelo pi kala suwi li ante. noka ona li kama weka la noka sin li kama lon. ni li nasa pona.

kala suwi li tawa telo li moku e pipi e kala ante lili. ken la ona li moku e kala sama lili.

kala li lili la ona li walo loje anu pimeja walo li suwi. taso ona li kama suli la ona li kama pi suwi ala. taso o pilin pona! tenpo ali la kala lili ni li ken awen lili! ona li ken unpa li kama mute kin. ni li nasa mute. kala lili li pilin e ni: "mi ken kama suli. taso ali li wile e ni tan seme? mi ante ala!".